ކޮނޑޭ ކުޑަކުދިންގެ ޕާކް މަރާމާތުކުރުމަށްފަހު ކުލަގަދަ ރަސްމިއްޔާތަކާއެކު ރަސްމީކޮށް ހުޅުވައިފި
ރަށުގެ ކުޑަކުދިންނާއި އާއިލާތަކަށް ހިތްފަސޭހަ، ރައްކާތެރި އަދި އުފާވެރި މާޙައުލެއް ޤާއިމުކޮށްދިނުމުގެ މަޤްޞަދުގައި ކޮނޑޭ ކައުންސިލުން ކުރިއަށް ގެންދިޔަ ކުޑަކުދިންގެ ޕާކް މަރާމާތުކުރުމުގެ މަސައްކަތްތައް ނިންމައި، ރަސްމީކޮށް ހުޅުވައިފިއެވެ.
ކުލަގަދަ ރަސްމިއްޔާތަކާއެކު ކުރިއަށް ދިޔަ މި ހަރަކާތް އިންތިޒާމް ކޮށްފައިވަނީ ކޮނޑޭ ކައުންސިލާއި، މި މަސައްކަތުގެ ކޮންޓްރެކްޓަރ “ޓޮޕް ތްރީ މޯލްޑިވްސް ޕްރައިވެޓް ލިމިޓެޑް” ގުޅިގެން، އެ ކުންފުނީގެ ސީ.އެސް.އާރު ގެ ދަށުންނެވެ.
މި މަޝްރޫޢުގެ ދަށުން ފުރިހަމަކުރެވުނު މުހިންމު މަސައްކަތްތަކުގެ ތެރޭގައި ޕާކުގައި ވޯކްވޭ ހަދައި ކާޕެޓް އެޅުމާއި، ޕާކު ޒީނަތްތެރިކުރުމަށް ކުލަލުމާއި، ކޭބަލް އަޅައި ލައިޓް ހަރުކުރުމާއި، ކުޑަކުދިން ކުޅޭ އައު ސާމާނު (ސީސޯ، ހޯސް އަދި ބޮޑު ޕްލޭ ސެޓެއް) ބެހެއްޓުމާއި، ޕާކުގެ މާޙައުލު ފެހިކުރުމަށް ރުއްގަސް އިންދުމާއި، ގަސްގަހުގެ ޕޮޓްތައް ހެދުން ހިމެނެއެވެ.
ޕާކު ހުޅުވުމަށް ބޭއްވުނު ހަވީރުގައި ބައިވެރިވި އެންމެހާ ކުޑަކުދިންނާއި، ބެލެނިވެރިންނާއި، ރަށުގެ ލޮބުވެތި ރައްޔިތުންނަށް ކައުންސިލުން ވަނީ ޝުކުރު ދަންނަވާފައެވެ. އަދި މި ރަސްމިއްޔާތު ކުލަގަދަކޮށް އިންތިޒާމް ކޮށްދެއްވުމުގައި “ޓޮޕް ތްރީ މޯލްޑިވްސް ޕްރައިވެޓް ލިމިޓެޑް” އިން ވެދެއްވި އެހީތެރިކަމާއި އެއްބާރުލުން ފާހަގަކޮށް ވަނީ ޝުކުރު އަދާކޮށްފައެވެ.
